Təhsildə inkişaf və innovasiyalar üzrə birinci qrant müsabiqəsinin qalibi olmuş “Qusar rayon Balaqusar Bələdiyyəsi ərazisində yerləşən 4 ümumtəhsil məktəbində peşəyönümü işinin inkişaf etdirilməsi” layihəsi öz işini davam etdirir.
Layihənin məqsədi səmərəli peşəyönümü sistemini hazırlayıb qurmaq vasitəsi ilə IX-XI sinif şagirdlərinin peşə və ixtisas seçimini təkmilləşdirmək və digər ümumtəhsil məktəblərində onların tətbiq edilməsi üçün nümayiş etdirməkdir.
Layihə çərçivəsində görüləcək işlər plana uyğun davam etdirilir. Hazırda layihənin hazırlıq işləri yekunlaşıb və tədbirlərin keçirilməsinə başlanılıb. 14 oktyabr 2017-ci il tarixində təlimçi və ekspertlərin məktəb rəhbərləri və müəllimlərlə görüşü təşkil olunub, layihənin məqsədi və vəzifələri haqqında seminar keçirilib. 21 oktyabr da Qusar rayon Həsənqala kənd tam orta və Bədirqala kənd ümumi orta məktəblərində oxuyan şagirdlərin valideynləri ilə layihə rəhbəri, ekspert və təlimçilərin görüşü təşkil olunub , valideynlərlə “peşəyönümünün mahiyyəti” mövzusunda təlim-seminar keçirilib.
Layihə çərçivəsində görüləcək işlər olaraq Həsənqala, Bədirqala, Balaqusar və Köhnə Xudat Qazmalar kənd məktəblərində könüllü müəllimlərdən peşəyönümü və ixtisasseçimi üzrə təlimçi –mütəxəsislərin hazırlanması, şagirdlər üçün peşəyönümü təlimlərinin və testlərin keçirlməsi, məsləhətlərin verilməsi, ümumtəhsil məktəbləri və peşə məktəbləri arasında əlaqələrin qurulmas, peşə məktəblərinə informasiya turlarının təşkil olunması, fiziki qüsurlu məktəblilərin peşəyönümü təlimlərində iştirakını təmin edilməsi nəzərdə tutulub.
Layihənin icra müddəti 3 aydır.
Qeyd edək ki, Təhsildə inkişaf və innovasiyalar üzrə birinci qrant müsabiqəsi dövlət ümumi təhsil müəssisələri və bu müəssisələrdə çalışan pedaqoji işçilər üçün elan edilmişdi. Müsabiqə çərçivəsində ümumi təhsil müəssisələri kateqoriyası üzrə təklif olunmuş 78 layihədən 37-si, fərdi kateqoriya üzrə isə 213 layihədən 83-ü olmaqla ümumilikdə 120 layihə qalib elan edilib.