Təhsil İnstitutunun qiymətləndirmə düşərgələri davam edir

Təhsil İnstitutunun və Mərkəzi Aran Regional Təhsil İdarəsinin birgə təşkilatçılığı ilə 16 – 18 avqust tarixlərində Mingəçevir şəhərində qiymətləndirmə düşərgəsi həyata keçirilib. Düşərgənin təşkil edilməsində əsas məqsəd müəllimlərin beynəlxalq qiymətləndirmə tədqiqatları barədə məlumatlılığını artırmaq, bu istiqamətdə səriştə əsaslı qiymətləndirmə vasitələri hazırlamaq üçün onlarda bilik və bacarıqları formalaşdırmaqdır.

Düşərgədə Mingəçevir şəhəri, Zərdab, Yevlax, Kürdəmir, Ucar, Göyçay və Ağdaş rayonlarından ümumilikdə 21 müəllim iştirak edib. 3 gün ərzində müəllimlər beynəlxalq qiymətləndirmə tədqiqatları barədə ümumi məlumat almaqla oxuyub-anlama üzrə mətn və tapşırıq nümunələri ilə tanış olublar. Əlavə olaraq, onlar fərdi və qrup şəklində mətn üzərindən səriştələrin müəyyənləşdirilməsinə dair fəaliyyətlərdə iştirak ediblər. “Qalereya gəzintisi” üsulu ilə qruplar hazırlanmış mətn və qiymətləndirmə vasitələrinə konstruktiv rəy bildirərək təkliflər əsasında hazırladıqları işləri ümumi auditoriyaya təqdim ediblər.

Düşərgənin sonuncu günündə Mərkəzi Aran RTİ- nin müdiri Elçin Kərimov Təhsil İnstitutu ilə əməkdaşlıqdan məmnun olduğunu bildirib və iştirakçıların təəssüratlarını öyrənməklə onlara öz tövsiyələrini verib. Təhsil İnstitutunun direktor müavini Ülkər Babayeva da öz növbəsində Azərbaycanın beynəlxalq qiymətləndirmə tədqiqatlarındakı iştirakı və bu qiymətləndirmələrin əhəmiyyətindən söz açıb, düşərgə iştirakçılarına qazandıqları bilik və bacarıqları təcrübələrində tətbiq etməyi, o cümlədən həmkarları ilə paylaşmağı bildirib.

Yekunda iştirakçılar sertifikatlarla təltif olublar.