Ümumi təhsil müəssisələrində metodik xidmətin təşkili çərçivəsində metodistlər tərəfindən dərsdinləmələr və metodik görüşlər təşkil olunur
Ümumi təhsil müəssisələrində tədris prosesinin keyfiyyətinin yüksəldilməsi məqsədilə məktəblərdə metodik xidmət sistemli şəkildə həyata keçirilir. Azərbaycan Respublikasının Təhsil İnstitutu (ARTİ) tərəfindən hazırlanan metodistlər məktəblərdə fəaliyyət göstərərək müəllimlərin peşəkar inkişafını dəstəkləyən metodik fəaliyyətlər icra edirlər.
Metodik fəaliyyətlərin əsas mərhələlərindən biri dərsdinləmələrin həyata keçirilməsidir. Metodistlər tərəfindən aparılan dərsdinləmələr zamanı müəllimlərin real dərs fəaliyyəti müşahidə olunur, dərsin strukturu, təlim məqsədlərinin reallaşdırılması, istifadə olunan təlim metodları, şagirdlərin fəallığı və əldə olunan öyrənmə nəticələri təhlil edilir. Bu müşahidələr müəllimlərin güclü tərəflərini və inkişaf ehtiyaclarını müəyyənləşdirməyə imkan verir.
Dərsdinləmələr nəticəsində formalaşan təhlillər əsasında müəllimlərin metodik ehtiyacları müəyyən edilir və bu ehtiyaclara uyğun olaraq dərsdinləmə sonrası metodik görüşlər təşkil olunur. Metodik görüşlər konkret ehtiyaclara əsaslanan, inkişafyönlü və praktik məzmunlu fəaliyyətlər kimi planlaşdırılır.
Dərsdinləmə sonrası keçirilən metodik görüşlər zamanı müəllimlərlə dərs planlaşdırılması, təlim məqsədlərinin dəqiqləşdirilməsi, fəal və interaktiv təlim üsullarının tətbiqi, şagirdyönümlü yanaşmaların gücləndirilməsi və qiymətləndirmə meyarlarının effektiv istifadəsi ilə bağlı məsələlər müzakirə olunur. Müəllimlərə praktiki tövsiyələr verilir, nümunə fəaliyyətlər təqdim olunur və reflektiv müzakirələr aparılır.
Bu yanaşma dərsdinləmə və metodik görüşlərin bir-birini tamamlayan ardıcıl mexanizm kimi fəaliyyət göstərməsini təmin edir, müəllimlərin peşəkar inkişafını məqsədyönlü şəkildə dəstəkləyir və nəticə etibarilə tədrisin keyfiyyətinin yüksəldilməsinə xidmət edir.
